S'amana l'ibierno
Entre meyo de l'agüerro que parize tristo, en trobarás a l'augua ristolera por os barrancos, cara t'abaxo, con as fuelletas d'a selba a cuestas.
Ista endreza d'agua, d'a Sierra Guara, baxa cantando a l'ibierno, con a mansa boz d'o monte, con a istoria de l'estiú.
Si pillas o camín que'n ba, dende Belsué enta Nozito, cobaxo d'o lugar de Lusera, en trobarás iste tresoro. Solo que a dos pasos de tierra e unos poquets más de piedra. Puyán, puyán ent'alto...en as badinas s'aduermen os barbols e as madrillas.
O suenio d'a chen d'a selba, as granotas, os cucos, o chés-chés...cuan s'amana o frío.
Biente-ne, agora que l'orache pinta iste terreno de pardo e colorau. A no muito faltar o silenzio estará danzán por astí.
A nonón, a nonón s'en ban os papirrois...chitón!
Sagardiana
Aragoneame
del.icio.us
Carmina Paraíso Santolaria, naxita al canto d'istas sierras. Crexié sintiendo ixas palabras que se'n ban marcha´n con a chen. A chen que'n marcha, cara bestene tu a saber qué atro lugar. Y o malo ye que, as palabras marchan dezaga d'a chen. Por ixo, dende istas pachinas, faré toz o que pueda ta que no reble a tierra mía, nunca no pas. Ni tampoco no los suyos bocables, ferius de muerte. "Ya se'n fué t'as tres pedretas" diz por istos lugars d'a sierra, cuan un ombre s'ha muerto. A Caseta d'as broxas ( "Dolmen, megalito, monumento funerario del Neolítico), ye l'ojeto, a reyalidá d'as tres pedretas...y allí en Ibirque luze bien pincho y zereño. A tierra d'os debampasaus, ye a nuestra tierra de agora, n'o sieglo XXI. As palabras bibas, d'ista luenga milenaria, feita de muitas luengas diferens, amuntonadas unas denzima d'as atras...no puede dixaparezer. Imos a fer un poquer de país. Por nusotros, por os que plegarán y por os que sen fuón.
Trobada de Fabloggers te combida a participar n'o suyo concurso de microfalordias. Anemate a nimbiar-nos a tuya falordieta, o ganador puet estar tu.http://trobada.blogdns.net
Trobada de fabloggers | 10-11-2008 - 00:16:58 GMT 1 #