Badina en Os Molinos de Sipán
D'agua fresqueta y clara, ista badina s'en troba n'a carretera que'n ba dende os Molinos de Sipán enta Las Almunias d'o Romeral.
A un poquet menos de tres kilometros de camín, tuerze un esbarre a man cucha.
Astí ez d'aturar l'auto. Deseguida pararez n'a cuenta d'una endreza que s'enfila, al canto una carrasca, caratabaxo.
En dos menutos trobarez una d'as millors pochancas que biha por iste semontano d'a Sierra Guara.
O puesto ye escoscau y muito bien cudiau.
A badina ye buena ta itarse a l'augua de todas as trazas e inchenios, dentrar a pie, de capeza, a pintacoda...
Si toz fa goyo a sompra, n'a mosquera de bellas carrascas, toz podrez itar buenas cucladetas.
Si, sez de esprito botanico y toz cuacan as yerbas y as plandas, bi ha por astí, coscoja, buxo, romaní, oregano, yerba de San Chuan, malbabisco...
Ye iste un puesto an trobar, asabelo de dineretes (fosils nunmulites), chicorrons, igual que as lentellas, u más grans, iguals que os "euros".
Por a badina, cuan no bi ha chen, puez bier as culebretas d'augua, as granotas, os barbols y as madrillas.
Por l'alto, igual bi ha suerte y te i trobas bel cluchigüesos, güetre u boleta.
Solo que ez de parar cuenta de dexar o puesto igual o millor que i yera antis de que en pleguez. Pero isto ye ta todo en a bida, eh?
Ixo si, me s'ublidaba de izirboz que si hay tronada por a Sierra, tenez cudiau con o río...que se mete furo. En iste trozo baxa encañonau y con fuerza.
Que toz faiga goyo el chapuzón, si toz amanaz por astí.
Sagardiana
Aragoneame
del.icio.us
Carmina Paraíso Santolaria, naxita al canto d'istas sierras. Crexié sintiendo ixas parolas que se'n ban marchán con a chen. A chen que'n marcha, cara bestene tu a saper qué atro lugar. Y o malo ye que, as parolas marchan dezaga d'a chen. Por ixo, dende istas pachinas, faré toz o que pueda ta que no reble a tierra mía, nunca no pas. Ni tampoco no, los suyos bocables, ferius de muerte. "Ya se'n fué t'as tres pedretas" diz por istos lugars d'a sierra, cuan un ombre s'ha muerto. A Caseta d'as broxas ( "Dolmen, megalito, monumento funerario del Neolítico), ye l'ojeto, a reyalidá d'as tres pedretas...y allí en Ibirque luze bien pincho y zereño. Ixe ye o primer retrato d'istos territorios que meto n'o blog. Toz os demás, me'n iré a pillane, cuan o tiempo m'acompañe, por ista tierreta mía, plena de bichos, augua, matas, luscos y amanezidas. A tierra d'os debampasaus, ye a nuestra tierra de agora, n'o sieglo XXI. As parolas bibas, d'ista luenga milenaria, no pueden dixaparezer. Imos a fer un poquer de país. Por nusotros, por os que plegarán y por toz os que ya no i son.
Salú y buen orache!
Ta contautar con yo sagardiana@gmail.com