sagardiana

Ayer de nueis, n'a radio, sintié que por Cuenca, a trenta kilometros d'a capital, eban bisto a os lupos fendo esferras con o ganau...

A un bezin l'en eban malfurriau d'os bacas.

Por un canto a conserbazión d'as espezies, por un altro a esfensa d'o territorio de l'ombre...

O lupo iberico, l'onso pirenaico...

¿Qué imos a fer con iste contornillo?

¿Parques tematicos?

¡No grazias!

Si han d'estar os lupos y os onsos bichos engarcholaus, solo que ta beyer-ne, d'escaparate, alimentaus por l'ombre, cudiaus, esbellejaus, acotolaus...engarcholaus ta que os ninos e os grans sepan que una begada bibión por asti...

Ixo ye bida?

Ye bida?

bida?

?

¡Que a bida siga ta cutio sin que l'ombre meta mucho a zarpa!

¿Estará berdá ixo d'a eboluzión d'as espezies?

                                                                               Sagardiana

Bellos lamíns ta busotros, amigos...

En o mío cuarenta e nueu cabo d'año,

grazias a toz por estar aquí

con mí.

                                                        Sagardiana

"Hegatzi errariak"

Mikel Laboa

Letra: Joseba Sarrionandia

.........

Paxaros errants

que s'han aturau n'a finestra

on a luz e a sompra 

se deseparan...

A luz e  a sompra

como  paxaros errants,

s'han aturau n'a finestra.

.........

O poeta e cantautor basco Mikel Laboa ba morir ayer, 1 d'abiento.

A suya boz campa ta cutio, bolán con os paxaros, por a berda luz d'as campas, e a blanca esbruzna d'o Cantabrico...

                                                                 Sagardiana

Naturaleza de l'arte.

Poesía d'a selba.

Polideza ta cutio d'a man d'os Yanomani.

                                                                        Sagardiana 

Si toz cuacan o monte y os suyos abitadors, aspero toz faiga onra iste bideo...porque muitismas bezes no i podemos beyer-ne y muitismas atras, sentimos a suya boz y no caemos n'a cuenta de qué bicho i ye charrán.

                                                              Sagardiana

S'esliza o tiempo con a Guatizalema. 

Abonico marcha.

Sol a iste canto, al atro guambra.

Ta cutio'l río, con a ulor de Guara

cara t'abaxo marcha,

acarrazán as margens an son as yerbas. 

A las trazas de l'augua

pasan os días n'as calendatas;

intes goyosos d'a luz que, amparan risas.

Foscos escais d'a sompra

que a tristera uloran.

Cuna ta un suenio de buro y piedra

tic-tac, tic-tac, tic-tac

Y no n'hay más.

                                                                             Sagardiana

Dimpués de muitas añadas dondiando por o planeta

l'ombre contina, terne que terne, con a suya angruzia.

A la fin, a crialla siempre tiene as de perder...y más que más os ninos indigenas n'o mundo globalizaú.

Pero...ta cutio, denzima d'as yerbas y cobaxo d'as boiras, i habrá  pueblos y chens diferens.  E unicos.

Ista canta ye un omenache ta toz els, ta toz os pueblos indigenas d'a Tierra y t'a toz os suyos ninos.   

                                                                            Sagardiana

Entre'l medio l'otoño que parez amurniéu

atoparás l'agua, cacariellu pelos carcabones,

cuesta baxu, colas fueyas del monte nell llombu.

Esta senda d'agua de Sierra Guara,

baxa cantandu l'enviernu con su  mansa voz del monte,

con la hestoria del branu.

Si coyes la caleya que vá desde Belsué pá Nozito,

so'l llugar de Llusera, atoparás esti tesoru.

Sele qu'a dos pasus de tierra ya unos pocus más de piedra.

Esgatiando. esgatiando pencima...en les cascades

donde pigázen los barbos y las madrillas,

el soño de la xente del monte;

les xaronques, los merucos, los paxarinus

con sus cantus y sonius

cuenten que acercáse el fríu.

Vien agora qu'l tiempu pinta'l terrenu de pardu y roxu

y munchu nun tardará'l silenciu en tar danzandu per aquí.

A dormir, a dormir vanse los raitanes...¡Chitón...!

Traduzión d'o post "S'amana l'ibierno", ta l'Asturianu, feita por o mío amigo Pachu Martín Martín, que a istas oras será con as suyas bacas por ixos praus d'Asturies.  Salú compañero y a plantar fuerte!

                                                                               Sagardiana 

Sagardiana de Bolea

que t'aduermes por as gleras

cuan a rosada s'empaza

con o berde d'as jedreas.

N'a Mata Sabina os güetres

encara bolán se'n ben

e as grudas se sienten alto

pasán Sasillo t'abaxo.

¿An yes,  que no i te'n bes?

-Soi cobaxo d'as ulors

d'os chinepros e as bucheras,

en foscas aldas soniando

con a luz d'a premabera.

    Adedicada al amigo que,una mañanada de l'estíu, retrató ista sagardiana, mirando Té de ralla,  por a Sierra Caballera.

                                                                                     Sagardiana

 Dando buelteta por Youtube m'en trobau unos zagals que baxaban por o Barranco Moliniello.

En Rasal le'n dizen barranco d'as Ollas.

Por o paco d'a sierra de Lobarre, d'entre pinos, cajicos, tileras, sanguiños, cantals, gorgas, felzes, orellas d'onso, silenzio e sompra...baxa l'augua enta'l Garona.

Si quiers plegar t'astí, y puyar-ne (en puesto de baxar), te'n digo:

Pilla l'esbarre que dende Arguis, camín d'o tunel d'a Manzanera, tira a man cucha, enta Rasal. A poco de pasar por o cobaxo d'o lugar, sin dentrar-ie, tira ta La Peña.

Cuan beigas una chopera jobena, al canto'l rio, a primer endreza que en trobes a man cucha, y por un camín de poquets metros cara t'abaxo, dexa l'auto.

Astí deban en tiens as partidas de Espaldadero y Moriniello, tambien l'en diz asinas. Iste trozo de monte ye muito empinau...por astí abentaban as troncas de pinos cuan feban saca...por ixo lo de espaldadero.

Bueno, que ye cosa de mirar más que de leyer...e yo m'enrollo muito cuan me meto a charrar d'a mía bal.

Ah, no t'en sublides de mirar t'alto...por astí en hay de cluchigüesos boletas e güetres. Dende a carretera en puez bier por as rayas, quietos paraus. Iste ye un buen puesto ta mirar-ne.

Bueno, que o biache siga goyoso...por astí seré.

Salú e a plantar fuerte!

                                                                 Sagardiana