Aqueras Montañas
Ta iste Chulio
que campa con a calor a cuestas...
una miajeta de Montaña
y de nieu.
A la buestra salú, ista canta
que ye... a nuestra canta.
Sagardiana
15/07/2009 GMT 1
Aragoneame
del.icio.us12/07/2009 GMT 1
Laberca de Loreto...abentura cutiana.
Astí deban, asti mismo
n'hay una abentura..,
no cal marchar muito luén.
Al canto Uesca...
As bolandrinas campan a raso l'augua,
en a Laberca de Loreto.
Fa calor, caloriza...
As birabolas, a cual más pincha,
d'asti t'allá,
con muita faina.
L'aneda mira de que no beiga as crietas
(5 l'en i contau...)
As flors d'as pauls tambien medran por astí.
Ista mosqueta canta todo'l día,
encara qué, de maitín, le'n cuaca más.
Cucos n'hay a zientos, de muitismas colors.
O chorlitejo me se mira fito-fito
(por si las moscas)
Ista birabola está de buen año.
Tornan as garzetas, de Baldabra y d'a Sotonera.
Uyyy, l'alica qué quiere berendar...
¡Jibo!...ascape marcha o gallico de San Martín.
Cadaguno a lo suyo
¡qué aprobeite!
Parize mentira qu'en aiga
tanta de chen en iste terreno.
Será l'augua?
A tardi pasa amonico,
pero pasa.
Luego se'n irá a dormir o somormujo...
Y o zaguer rayez de sol
marchará por Torresecas.
De nueis,
solo qué se sentirán
granotas
y mochuelos.
Sagardiana
26/05/2009 GMT 1
Birabolas ta una premabera chicorrona
Como os dias d'as birabolas
o tiempo marcha escapau.
Escapau como as colors d'os cardos
y a ulor de Mayo.
Cantas de premabera chicorrona
suenios,
y albadas
bordaus en l'aire...
Sagardiana
08/01/2009 GMT 1
Tresoro d'augua en meyo'l secano
Por chinero n'a laberca
correderas
albarderos
mosquetas
abadejeros
anedas
alicachos de laberca
en o lugar de Loreto
Tresoro d'augua de la Isuela
en meyo'l secano.
Sagardiana
04/01/2009 GMT 1
Alica azul - Circus cyaneus - Aguilucho pálido
Alicas azuls, o primer día d'ista añada
por a Plana de Uesca
Sagardiana
28/12/2008 GMT 1
Luminetas
No todo ye lo que aparenta...
Ye a mar?
No, no pas.
No ye a mar d'auguas salatas, no.
Ye a boira preta, mesa n'a Plana de Uesca.
.........
Chiran as ruedas?
Qué u quí en fá chirar?
.........
Un gúetre bolán e a suya sompra?
No, no pas.
Son dos güetres, bolán por Badiello...
Solo que uno en biene y l'altro se'n ba.
.........
Os ruellos s'enruellan?
Luminetas d'os tuyos güellos?
.........
´Flors de cotón?
No, no pas.
Ye a zaguera nieu d'abiento, n'a Sierra de Bonés,
amorosiando as matetas de cabezuda.
(Ta o día d'os Inozens, ta que nunca no pas, nos dexemos d'engañar con a primera bista...Encara que, de begadas, sigan millors os suenios que a reyalidá)
Sagardiana
20/12/2008 GMT 1
Cantals que nunzian l'ibierno
Con os rayez d'o sol,
tocán seguntes que cantals, ficaus n'a tierra,
os ombres debampasaus sapeban,
muy dinantes de nusotros,
l'inte machico de l'amanezida de l'ibierno.
Sagardiana
17/12/2008 GMT 1
Gurrión de canalera
Por medio d'os autos
mirán de pillar bella cosa, ta itar-se n'o buche,
iste gurrión de canalera, pincho y zereño,
marchó con un "riskito" n'o pico.
Dimpués i-tornó,
encara que...ya no n'había
ni tita ni pón.
Sagardiana
12/12/2008 GMT 1
Tardada d'abiento n'a Plana de Uesca
N'a Laberca de Loreto
unos paxaros pasan os días.
Unatros, sólo que de paso
ta l'ibierno biben
con a machia de l'augua d'a Isuela
embalsada n'a Plana.
Por o cobalto d'os sasos de Banariés
y os campos de cantals de Cuarte,
a la tardada
esnabesan o zielo de Loreto
bandadas de grallas, bolacos e tordos
camín d'a ziudá.
A l'anochezida, no se siente cosa.
A la nana d'os carrizos de l'aberca
as anedas duermen.
E os paxaros suenian
pretos n'o pinar.
Sagardiana
Lupo
Ayer de nueis, n'a radio, sintié que por Cuenca, a trenta kilometros d'a capital, eban bisto a os lupos fendo esferras con o ganau...
A un bezin l'en eban malfurriau d'os bacas.
Por un canto a conserbazión d'as espezies, por un altro a esfensa d'o territorio de l'ombre...
O lupo iberico, l'onso pirenaico...
¿Qué imos a fer con iste contornillo?
¿Parques tematicos?
¡No grazias!
Si han d'estar os lupos y os onsos bichos engarcholaus, solo que ta beyer-ne, d'escaparate, alimentaus por l'ombre, cudiaus, esbellejaus, acotolaus...engarcholaus ta que os ninos e os grans sepan que una begada bibión por asti...
Ixo ye bida?
Ye bida?
bida?
?
¡Que a bida siga ta cutio sin que l'ombre meta mucho a zarpa!
¿Estará berdá ixo d'a eboluzión d'as espezies?
Sagardiana
Carmina Paraíso Santolaria, naxita al canto d'istas sierras. Crexié sintiendo ixas palabras que se'n ban marcha´n con a chen. A chen que'n marcha, cara bestene tu a saber qué atro lugar. Y o malo ye que, as palabras marchan dezaga d'a chen. Por ixo, dende istas pachinas, faré toz o que pueda ta que no reble a tierra mía, nunca no pas. Ni tampoco no los suyos bocables, ferius de muerte. "Ya se'n fué t'as tres pedretas" diz por istos lugars d'a sierra, cuan un ombre s'ha muerto. A Caseta d'as broxas ( "Dolmen, megalito, monumento funerario del Neolítico), ye l'ojeto, a reyalidá d'as tres pedretas...y allí en Ibirque luze bien pincho y zereño. A tierra d'os debampasaus, ye a nuestra tierra de agora, n'o sieglo XXI. As palabras bibas, d'ista luenga milenaria, feita de muitas luengas diferens, amuntonadas unas denzima d'as atras...no puede dixaparezer. Imos a fer un poquer de país. Por nusotros, por os que plegarán y por os que sen fuón.