sagardiana

Por medio d'os autos

mirán de pillar bella cosa, ta itar-se n'o buche,

iste gurrión de canalera, pincho y zereño,

marchó con un "riskito" n'o pico.

Dimpués i-tornó,

encara que...ya no n'había

ni tita ni pón.

                                                           Sagardiana

N'a Laberca de Loreto

unos paxaros pasan os días.

Unatros, sólo que de paso

ta l'ibierno biben

con a machia de l'augua d'a Isuela 

embalsada n'a Plana.

 Por o cobalto d'os sasos de Banariés

y os campos de cantals de Cuarte,

a la tardada

esnabesan o zielo de Loreto 

bandadas de grallas, bolacos e tordos 

camín d'a ziudá.

A l'anochezida, no se siente cosa.

A la nana d'os carrizos de l'aberca 

as anedas duermen.

E os paxaros suenian

pretos n'o pinar.

                                                                                   Sagardiana           

Ayer de nueis, n'a radio, sintié que por Cuenca, a trenta kilometros d'a capital, eban bisto a os lupos fendo esferras con o ganau...

A un bezin l'en eban malfurriau d'os bacas.

Por un canto a conserbazión d'as espezies, por un altro a esfensa d'o territorio de l'ombre...

O lupo iberico, l'onso pirenaico...

¿Qué imos a fer con iste contornillo?

¿Parques tematicos?

¡No grazias!

Si han d'estar os lupos y os onsos bichos engarcholaus, solo que ta beyer-ne, d'escaparate, alimentaus por l'ombre, cudiaus, esbellejaus, acotolaus...engarcholaus ta que os ninos e os grans sepan que una begada bibión por asti...

Ixo ye bida?

Ye bida?

bida?

?

¡Que a bida siga ta cutio sin que l'ombre meta mucho a zarpa!

¿Estará berdá ixo d'a eboluzión d'as espezies?

                                                                               Sagardiana

Si toz cuacan o monte y os suyos abitadors, aspero toz faiga onra iste bideo...porque muitismas bezes no i podemos beyer-ne y muitismas atras, sentimos a suya boz y no caemos n'a cuenta de qué bicho i ye charrán.

                                                              Sagardiana

Sagardiana de Bolea

que t'aduermes por as gleras

cuan a rosada s'empaza

con o berde d'as jedreas.

N'a Mata Sabina os güetres

encara bolán se'n ben

e as grudas se sienten alto

pasán Sasillo t'abaxo.

¿An yes,  que no i te'n bes?

-Soi cobaxo d'as ulors

d'os chinepros e as bucheras,

en foscas aldas soniando

con a luz d'a premabera.

    Adedicada al amigo que,una mañanada de l'estíu, retrató ista sagardiana, mirando Té de ralla,  por a Sierra Caballera.

                                                                                     Sagardiana

Cuan a nieu caye por a sierra

un cluchigüesos s'acotrazia.

Belleza a caramuello, polideza, magenzia.

No fan falta palabras...

                                                      Sagardiana