Cualsiquier puesto d'o mon
que se'n quema...
Ista bez, San Gregorio
O fumo d'a quema que campa por a Ribera Alta
y as Zinco Billas.
Asinas s'en bei,
a ixo d'as ueito y meya d'a tardi,
dende a Laberca de Loreto
en a Plana de Uesca.
Y asinas puede estar qué
bella curruca zarzera
igual que ista, d'atra quema,
en i aiga teniu a suerte
de escapar...
Encara que, puede estar que solo qué
de momento.
Qué pena.
Sagardiana
N'as alas, as birabolas
en portan güellos...
Güellos ta que ne beigas
u solo que por que sí...
D'astí, t'allá...bolán y bolán.
Dende os tiempos d'antismás
"Güellos de sangre" dondía por astí
con o suyo bolito de papel.
Por a selba, n'os barrancos,
en os sasos...
as colors de l'estíu
en as alas brillan.
Con istos güellos míos,
beigo como en marchan...
os días d'e Chulio y Agosto...
con as birabolas
de l'Alto Aragón.
Sagardiana
Laberca de Cortés
al canto de Chimillas
en a Plana de Uesca.
Garrapescaires y anedas
que s'amagan
(ta que no les ne beigas).
Gabinas...
que implen l'azul d'a laberca ,de blanco
pardo y griso.
Y en as zentenas de plachas
que a calor de l'estíu
ba dexán...
correlimos?
y engañapastors
que se pasan a tardi
rechirando'l buro, mirando cucos.
Cuan l'aigua d'a Isuela baxa d'Arguis,
son por astí de paso...
como yo.
Solo que antonces.
Sagardiana
Grazias por amostrar-me que iste paxarez
ye una cardelina chobena.
Pués no t'en creigas,
la de bueltas que le'n di.
Mira-te qué,
pensar que igual as colors
se le'n iban marchau con l'agüerro...
Una cardelina chobena, pués.
¡Qué bonica que ye!
Sagardiana
Ista tardi feba muitismo aire por a laberca.
Pensé: mal orache ta fer retratos...
encara qué l'arnalero quereba en fer-se uno
Dimpués, una bolandrina, de cara'l zierzo
en iba escapada, d'astí t'allá
bien pincha
Al rato, plegó un biello amigo d'iste ibierno...
l'albardero que'n pasó con yo muitas tardadas de frío
L'aire no paraba...
y os paxaros tampoco no se estaban miaja de quietos.
Ista...creigo que ye una cardelina, encara qué
an ido a parar as suyas colors d'agüerro?
Al canto'l augua...un chorlito buscaba cucos.
Y yo, chorlitos ta retratar.
Al punto marchar, alcontré un tresoro:
o mochuelo...
acucután.
En una tarde d'aire en Loreto...
Sagardiana
Astí deban, asti mismo
n'hay una abentura..,
no cal marchar muito luén.
Al canto Uesca...
As bolandrinas campan a raso l'augua,
en a Laberca de Loreto.
Fa calor, caloriza...
As birabolas, a cual más pincha,
d'asti t'allá,
con muita faina.
L'aneda mira de que no beiga as crietas
(5 l'en i contau...)
As flors d'as pauls tambien medran por astí.
Ista mosqueta canta todo'l día,
encara qué, de maitín, le'n cuaca más.
Cucos n'hay a zientos, de muitismas colors.
O chorlitejo me se mira fito-fito
(por si las moscas)
Ista birabola está de buen año.
Tornan as garzetas, de Baldabra y d'a Sotonera.
Uyyy, l'alica qué quiere berendar...
¡Jibo!...ascape marcha o gallico de San Martín.
Cadaguno a lo suyo
¡qué aprobeite!
Parize mentira qu'en aiga
tanta de chen en iste terreno.
Será l'augua?
A tardi pasa amonico,
pero pasa.
Luego se'n irá a dormir o somormujo...
Y o zaguer rayez de sol
marchará por Torresecas.
De nueis,
solo qué se sentirán
granotas
y mochuelos.
Sagardiana
Como os dias d'as birabolas
o tiempo marcha escapau.
Escapau como as colors d'os cardos
y a ulor de Mayo.
Cantas de premabera chicorrona
suenios,
y albadas
bordaus en l'aire...
Sagardiana
Por chinero n'a laberca
correderas
albarderos
mosquetas
abadejeros
anedas
alicachos de laberca
en o lugar de Loreto
Tresoro d'augua de la Isuela
en meyo'l secano.
Sagardiana
Alicas azuls, o primer día d'ista añada
por a Plana de Uesca
Sagardiana
No todo ye lo que aparenta...
Ye a mar?
No, no pas.
No ye a mar d'auguas salatas, no.
Ye a boira preta, mesa n'a Plana de Uesca.
.........
Chiran as ruedas?
Qué u quí en fá chirar?
.........
Un gúetre bolán e a suya sompra?
No, no pas.
Son dos güetres, bolán por Badiello...
Solo que uno en biene y l'altro se'n ba.
.........
Os ruellos s'enruellan?
Luminetas d'os tuyos güellos?
.........
´Flors de cotón?
No, no pas.
Ye a zaguera nieu d'abiento, n'a Sierra de Bonés,
amorosiando as matetas de cabezuda.
(Ta o día d'os Inozens, ta que nunca no pas, nos dexemos d'engañar con a primera bista...Encara que, de begadas, sigan millors os suenios que a reyalidá)
Sagardiana
Archibo | ¡Creya tu Blog ya! Fázil y de Baldes
Aragoneame
del.icio.us
Carmina Paraíso Santolaria, naxita al canto d'istas sierras. Crexié sintiendo ixas palabras que se'n ban marcha´n con a chen. A chen que'n marcha, cara bestene tu a saber qué atro lugar. Y o malo ye que, as palabras marchan dezaga d'a chen. Por ixo, dende istas pachinas, faré toz o que pueda ta que no reble a tierra mía, nunca no pas. Ni tampoco no los suyos bocables, ferius de muerte. "Ya se'n fué t'as tres pedretas" diz por istos lugars d'a sierra, cuan un ombre s'ha muerto. A Caseta d'as broxas ( "Dolmen, megalito, monumento funerario del Neolítico), ye l'ojeto, a reyalidá d'as tres pedretas...y allí en Ibirque luze bien pincho y zereño. A tierra d'os debampasaus, ye a nuestra tierra de agora, n'o sieglo XXI. As palabras bibas, d'ista luenga milenaria, feita de muitas luengas diferens, amuntonadas unas denzima d'as atras...no puede dixaparezer. Imos a fer un poquer de país. Por nusotros, por os que plegarán y por os que sen fuón.