sagardiana

 Dando buelteta por Youtube m'en trobau unos zagals que baxaban por o Barranco Moliniello.

En Rasal le'n dizen barranco d'as Ollas.

Por o paco d'a sierra de Lobarre, d'entre pinos, cajicos, tileras, sanguiños, cantals, gorgas, felzes, orellas d'onso, silenzio e sompra...baxa l'augua enta'l Garona.

Si quiers plegar t'astí, y puyar-ne (en puesto de baxar), te'n digo:

Pilla l'esbarre que dende Arguis, camín d'o tunel d'a Manzanera, tira a man cucha, enta Rasal. A poco de pasar por o cobaxo d'o lugar, sin dentrar-ie, tira ta La Peña.

Cuan beigas una chopera jobena, al canto'l rio, a primer endreza que en trobes a man cucha, y por un camín de poquets metros cara t'abaxo, dexa l'auto.

Astí deban en tiens as partidas de Espaldadero y Moriniello, tambien l'en diz asinas. Iste trozo de monte ye muito empinau...por astí abentaban as troncas de pinos cuan feban saca...por ixo lo de espaldadero.

Bueno, que ye cosa de mirar más que de leyer...e yo m'enrollo muito cuan me meto a charrar d'a mía bal.

Ah, no t'en sublides de mirar t'alto...por astí en hay de cluchigüesos boletas e güetres. Dende a carretera en puez bier por as rayas, quietos paraus. Iste ye un buen puesto ta mirar-ne.

Bueno, que o biache siga goyoso...por astí seré.

Salú e a plantar fuerte!

                                                                 Sagardiana

Entre meyo de l'agüerro que parize tristo, en trobarás a l'augua ristolera por os barrancos, cara t'abaxo, con as fuelletas d'a selba a cuestas.

Ista endreza d'agua, d'a Sierra Guara, baxa cantando a l'ibierno, con a mansa boz d'o monte, con a istoria de l'estiú.

Si pillas o camín que'n ba, dende Belsué enta Nozito, cobaxo d'o lugar de Lusera, en trobarás iste tresoro. Solo que a dos pasos de tierra e unos poquets más de piedra. Puyán, puyán ent'alto...en as badinas s'aduermen os barbols e as madrillas.

O suenio d'a chen d'a selba, as granotas, os cucos, o chés-chés...cuan s'amana o frío.

Biente-ne, agora que l'orache pinta iste terreno de pardo e colorau. A no muito faltar o silenzio estará danzán por astí.

A nonón, a nonón s'en ban os papirrois...chitón!

                                                                Sagardiana

D'agua fresqueta y clara, ista badina s'en troba n'a carretera que'n ba dende os Molinos de Sipán enta Las Almunias d'o Romeral.

A un poquet menos de tres kilometros de camín, tuerze un esbarre a man cucha.

Astí ez d'aturar l'auto. Deseguida pararez n'a cuenta d'una endreza que s'enfila, al canto una carrasca, caratabaxo.

En dos menutos trobarez una d'as millors pochancas que biha por  iste semontano d'a Sierra Guara.

O puesto ye escoscau y muito bien cudiau.

A badina ye buena ta itarse a l'augua de todas as trazas e inchenios, dentrar a pie, de capeza, a pintacoda...

Si  toz fa goyo a sompra, n'a mosquera de bellas carrascas, toz podrez itar buenas cucladetas.

Si, sez de esprito botanico y toz cuacan as yerbas y as plandas, bi ha por astí, coscoja, buxo, romaní, oregano, yerba de San Chuan, malbabisco...

Ye iste un puesto an trobar, asabelo de dineretes (fosils nunmulites), chicorrons, igual que as lentellas, u más grans, iguals que os "euros".

Por a badina, cuan no bi ha chen, puez bier as culebretas d'augua, as granotas, os barbols y as madrillas.

Por l'alto, igual bi ha suerte y te i trobas bel cluchigüesos, güetre u boleta.

Solo que ez de parar cuenta de dexar o puesto igual o millor que i yera antis de que en pleguez. Pero isto ye ta todo en a bida, eh?

Ixo si, me s'ublidaba de izirboz que si hay tronada por a Sierra, tenez cudiau con o río...que se mete furo. En iste trozo baxa encañonau y con fuerza.  

Que toz faiga goyo el chapuzón, si toz amanaz por astí.

                                                                                     Sagardiana