sagardiana

En Santa Elena, iste meyodía

con o sol que paizeba de l'estíu

e ista birabola d'a Bal de Tena.

                                                                     Sagardiana

Cuan por astí, ya ban baxán os ganaus de puerto...

ista canta suena, más entallá;

ta toz os pastors d'o mundo.

                                                   Sagardiana

 Aurín n'as fuellas,

ulor d'agüerro

que l'augua en porta,

bal t'abaxo

y en as yerbas xutas,

s'apedeca.

Aurín, n'as nanas

d'a chunguera

y n'os lulos royos

d'a gabardera.

Aurín qué,

setiembre adora,

por os suelos

a simiente acuna.

A boz d'a plata,

d'aimors con l'estíu,

cariños en a balsa,

plora.

Plega l'agërro

y o frío plega.

Plega la mansa

y toba

siñal que,

a puenda que se abiene,

nueis de zierzo

y plebias, nunzia.

                                                                                Sagardiana

Se'n fican n'os arbols,

y n'as matas...acucután,

fito, fito

y de bislay.

A lo moscón y con tiento

poquer a poquer se fían.

De cabo cuán amanezen

n'os camals por un inte,

te se miran...

 Alparzeros albarderos

que por a laberca crían,

mosquiteros que a la tardi

dende a mosquera, cosiran.

                                                                               Sagardiana

Ya no i son os bolitos

que parán astí,

a bolandrina, amoniquer, texeba.

As oras, con l'anima libre

dende a premabera,

pasón con l'estíu.

Y tu boz sonaba en l'aire...

Ixambre de paxarelas mutas.

Luén, luén de yo,

yeras.

Luen, y tan a mán...

Tan a mán, como o brillo d'as alas

y a tardi,

y a ulor de setiembre que torna con tú...

Asinas, d'entre bolitos breus,

amanezebas.

O mío pulso marchaba

con o bolito escapau;

igual que l'angruzia de biyer-te.

Igual que as bolandrinas...

esnabesé o disierto.

Ixe disierto qué,

ya no ye cosa,

agora qué se chupen as fuellas

d'a yerba en puerto.

A bolandrina y tu

tan de luén...

y tan a mán.

                                                                            Sagardiana