sagardiana

Así de poliu i yera iste ababol en o sembrau, ista premabera, con la d'augua que en ba caer por as articas.

Ista tardi, en primers d'agosto, me'n fue a dar buelteta por a Bal...y en trobé muitismo ganau suelto por o camín, bacas y betiellos.

N'a Pardinilla de Bentue, una pila caballos.

Por as margenes, bella perdíz con 6 u 7 perdiganas dezaga, pizpiretas y bien cutietas.

A yo, en agosto, no me se feguraba mesejante espectaclo.

Atras puendas l'ambista yera mas secarrera, pero as plebias d'abril ban benir a meter ista color.

As obellas y a crabetas por o río feban musiqueta, sonaban una bentena d'esquilas y un esquilón, cobaxo a Garoneta Biella,mientres un aire de pelicula remenaba as fuellas d'os buchos, sanguiños, salzeras, azerolleras y caxicos.

Dimpués buelta ta casa, con o peito y os libianos bien fartos d'aire puro y o corazón goyoso de saper que a mía bal encara ye biba.

Grazias por ixo, a la chen que i bibe y en fa florezer cada día.

L'ababol bá por els y ellas.

Salú.

                                       Sagardiana

Fa 30 añadas, iste lugar yera asinas. Y asinas ye güe, con unas cuantas casas más...encara que o puesto contina estando igual de poliu.

Ista ye la entrada, por a carretera que tira ent'a o tunel viello d'a Manzanera, t'as bals de Belsué y Garona.

En o lugar d'Arguis podez en trobar bels cafès y ristorants ta minchar u pasar un buen rato. L'Espería, a poco de pasar as espelungas de San Climén y La Foz, cobaxo d'o lugar, por a mesma carretera.

Dende astí, gambadetas a punta pala, ta toz os gustos y en todas as puendas.

En primers d'Agosto, con ista caloriza que fá, podez tirar ent'as badinas de Santa María de Belsué, con l'agua rica, rica d'o Flumén, que'n baxa de Bonés bien fresqueta.

Ta plegar i, solo ez de pillar a carretera enta o tunel d'a Manzanera y endrezar l'auto enta la pista que, a man dreita, baxa to lugar. Una vez que en pleguez to Belsué iz de seguir t'adebán, sin dentrar ie.

O Lugar s'en quedará a man dreita, alto.

Por a pista, dimpues de pasar al canto d'uns ortals, que en fa goyo bier-ne y una paridera, por meyo d'os terreros y os sembraus, a pista plega enta l'entibo de Belsué.

Biha una chopera y asti sen puede dexar l'auto.

O Flumen por aquí ye fazil de puyar, por as margens.

Alguna mateta que otra, d'aulagas u lastón, xaboneras, gabarderas, salzs... y bella culebreta d'augua.

Paraz cuenta con as gripias, escurzons y brispas...

No tos acoflez n'o suelo en d'os pete, "como soi de campo aquí me zampo" no. Mirar bien antis. As gripias les gusta d'enroscarsen en as troncas d'os buxos a tomar a fresqueta y n'as d'espigol y en cualsiquier mateta con buena sombra.

A os escurzons les cuaca d'estarsen cobaxo as toscas y as piedras d'as graberas, al solano, a mán de l'augua.

D'as brispas ya no en digo cosa y d'as abelletas no i bisto por iste trozo arnals, no quiero izir que no en aiga.

Solo que con istos bichos iz de ir con ojo...

Pero en plegar t'as pochancas de Santa María...todo ba estar por bien pasau...

 Buen calzero y ganas de bibir un rater en o mon, ixo fa falta.

Benir ie y prebar-ne

Sez conbidaus.

Sagardiana

Piedra rayo, ta espantar as cendellas n'as tronadas.

Cuan plegón os primers abitadors por istas sierras prexino que l'ambista yera diferén...encara que, por suerte u por disgrazia, dende a Pardina d'a Garoneta de Rasal enta os feners de Bara, as bals y semontanos d'as caras puerto d'as sierras esteriors pirenencas, parixen ficadas n'os tiempos d'antismás. 

Ta muestra iste botón: No fa muito que plegó a luz enta Nozito...no ye mentira, no.   

Con o turismo rural, y as ganas que a chen en tien de marchar d'as ziudaz, os días de l'estiu y muitismos cabo semana, as eras y os ortals s'implen d'abitadors y besitans.

Al amparo d'as piedras rayo, as tiñas escachadas, aguantan o temporal. 

A chen d'a sierra, alza n'a memoria sieglos de conozimiento e superstizións.

Igual te mete una piedra rayo, n'a punta chaminera, que unas estijeras d'enzima o calibo y a zenisa d'o fogar, que una piedra modorra n'o portalón d'o cubierto d'as parideras, que un ramer de bucho en un foratizo entre as parez d'as bordas...

A primer bista, isto puede parizer una fateza, pero no i ye asinas...

Se'n tomaban muita faina ta replegar piedras d'istas...Tan de seria ye la cosa como que a piedra modorra no se'n podeba replegar en os campos de uno, no. Tenebas que írtene luen...y dimpues meter-ne n'os corrals.

O ramer de bucho, ebas de replegar-ne n'a nuei de San Chuan.

As estijeras, eban de dejar-ne ubiertas, fendo a forma d'una cruz.

En istos países as piedras han estau emplegadas, no solo que d'alazet de casas y tapials, adoquins ta os camíns u ruellos...

En as sierras de Gratal y Guara as piedras tienen o poder d'a machia. De chenerazión en chenerazión, os abitadros ban alzar a sapienzia d'os primers abitadors. Aquers cazataires nomadas que plegón t'astí, por os camins d'o Pireneo.

A piedra rayo, a piedra modorra, as tres pedretas, a piedra espantabrujas, as piedras de seguntes que manantials, os muntonez de piedras siñalán o lugar en do ficar presens ta os santos u os dioses, as piedras adintro d'as tenajas, ta conservar l'augua...

Y asinas pasan os sieglos por as bals y os lugars, repelgando nuebos conozimiens sin sublidar, nunca no, que i somos astí, en o mesmo terreno que ers...

Ers, os primers abitadors d'istas sierras, os fazedors d'as piedras rayo, os ombres preistoricos, os nuestros debampasaus en o que a ocupazión de suelo pertoca.

                                                      sagardiana 

O benién post, no sé si ye estau escrito entre que en beniba y se'n iba un tierratremol por istas sierras.

A cosa ye que, de sopetón, cuan en beigo publicau, astí, debán d'os güellos...Qué algarada!

Ya en beyerez, zinco u seis fotos d'un fayar...en catafila...una ringlera copias en metá d'o testo...

Ixo me pasa por no mimarme-ne a bista preleminar. Qué torrollón!

Bueno, solo que ta demanarboz desincusas son istas líneas.

Salú y a plantar fuerte!

                                                                         sagardiana

A istas alturas, por as selbas d'azirons y fayos, en os pacos d'os puestos más alteros d'a sierra, amanexen tresoros.

Por cualsiquier rincon asuman os fongos...azuls, pardos, de todas as colors...si ye año d'augua.

En que plegan as primers tronadas de l'estíu a fiesta prenzipia...a ulor a mon chupiu, os rayez de llum por entre meyo as fuellas, que baxan ta amorosiar o suelo...a molsa en os cantos d'as piedras, a canta de l'aire por a selba.

Si toz puyaz por o lugar d'Arguis, en pasar as casas, por a carretera que'n ba ta Bentué de Rasal, en o primer esbarre a mán cucha pillarez una endreza que puya enta un d'os millors rincons de toda la redolada... a selba de fayos de Gratal.

Dende astí alto, se'n puede bier toda la Plana de Uesca y a Sotonera y en días clariscos...o Moncayo.

O pico de Gratal y o món Peiró son os zaguers reductos de clima ozeanico, más enta l'orien, n'as sierras esteriors de Uesca.

Por ixo, que i bi ye iste fayar, amostrando a suya berdor d'entre as calizas.

Si toz cuaca de benir...por astí i soy, a la fresqueta dún buxo.

                                                               Sagardiana

A l'augua que baxa, d'as sierras al mar...

A l'augua que'n torna d'a mar, con as plebias.

A l'augua que corre por debaxo as piedras...

Sierra de Lobarre, Sierra d'Aquilué

Sierra Caballera.

A la canta d'os manantials.

Al barranco San Martín.

A la Fuenfría.

Al peine d'a mora d'a Birchen d'os ríos.

Al Alacay, chardín de molsa entre caxicos. 

A  l'agua salada que as mullers i ploran...

Sin d'ombres...silenzio n'as güertas;

ni albaca, ni lidios, ni ramez de rosas.

 A las glarimas d'as lolas

que'n boiras guallardas por Bentué y Rasal

implen as pauls y los caños d'agua.

A la chen d'as sierras que aguantan de pie

na tierreta mía, a Bal d'a Garona.

                                                                                    Sagardiana

D'agua fresqueta y clara, ista badina s'en troba en a carretara que'n ba dende os Molinos de Sipan enta Las Almunias del Romeral.

A un poquet menos de tres kilometros de camín, tuerze un esbarre a man cucha.

Astí ez d'aturar l'auto y deseguida pararez n'a cuenta d'una endreza que s'enfila, al canto una carrasca, caratabaxo.

En dos menutos trobarez una d'as millors pochancas que biha por  iste semontano d'a Sierra Guara.

O puesto ye escoscau y muito bien cudiau.

A badina ye buena ta itarse a l'augua de todas as trazas e inchenios, dentrar a pie, de capeza, a pintacoda...

S' toz agrada la sompra, a la mosquera de bellas carrascas, toz podrez itar buena cucladeta.

Si, sez de espiritu botanico y toz cuacan as yerbas y as plandas, bi ha por astí, coscoja, buxo, romaní, oregano, yerba de San Chuan, malbabisco...

Ye iste un puesto an trobar, asabelo de dineretes (fosils nunmulites), chicorrons, igual que as lentellas, u más grans, iguals que os "euros".

Por a badina, cuan no bi ha chen, puez bier as culebretas d'augua, as granotas, os barbols y as madrillas.

Por l'alto, igual bi ha suerte y te i trobas bel cluchigüesos, güetre u boleta.

Solo que ez de parar cuenta de dexar o puesto igual o millor que i yera antis de que en pleguez. Pero isto ye ta todo en a bida, eh?

Ixo si, me s'ublidaba de izirboz que si biha tronada por a Sierra, tenez cudiau con o río...que se mete furo. En iste trozo baxa encañonau y con fuerza.  

Que toz faiga goyo el chapuzón, si toz amanaz por astí.

                                                                                     sagaradiana

Ista ye una crabeta d'atro país, un pais berde al canto'l mar.

Por a Sierra Gratal, en eba, no fa muitos días, un rabaño crabas prou pincho.

Cosa rara en istos tiempos, ganau estensibo de berdá.

No ye que iste terreno... no siga berde

Tampoco no... que ande a faltar d'augua.

A cosa ye que... ya no i quedan crabas sueltas por a sierra.

En plegar abril, en beyebas o rabaño por as rallas, mirabas t'alto y...a poco que t'estases quieto parau...una por astí, l'atra por allá, zinco u seis más entallá...D'isto no fa ni tres sanmigaladas, eh?

O mairal, feba solo que tres u cuatro bueltas, en to'l estiu, ta itarlesne torruecos de sal.

Yera o rabaño más pincho que nunca no i bisto.

En mala ora, una peste metió malas a dos u tres crabetas. De resultas, o mairal tenió que matar o ganau entero. Zerca de 350 bichos.

Un d's zaguers rabaños sueltos en as sierras d'Aragón

L'amo el ganau... ya nunca no quiere estarse mairal

S'ha metiu a criar planta, ta os chardins zebilizaus...

Os matizos y as barzas están bien grans a istas oras. Mira...beluno teneba que salir ganando.

Luego diz que biha fuegos...y qué quiers! Si n'imos dexau albandonau el mon y a ras chens d'o mon!

Os güetres, atra istoria! Con as leis ixas d'os contenedors y os bichos muertos empaquetaus...No ye de dar!

Dimpues dirán que os güetres, as boletas, os cluchigüesos, se'n ban u dixaparixen d'o mapa...¿Ta qué tanta lei de proteuzión d'espezies?

Como en tien de fambre, os pobrichons, se han tornau birolos y montan unas esferras por os corrals, d'aquí t'espero.

Bi abrá que asperar a bier que lei nos sacan agora, pero isto no tien trazas de apañarse.

Y a Lei a quien protexerá? a la chen d'os lugars?

Y a chen podrá bibir en os lugars, sin marcharsen?

U a la fin os lugars y as chens imos a ser os comedians y l'eszenario d'un parque tematico?

O guía, muitismo bien informau, les ne irá contando una istoria:

"Astí, bi abió un rabaño. O mairal yera iste, beyen?, en iste panel. Ah, si!...tambien  bi eban güetres por as rallas, beigan iste atro retrato; u si no, millor, en l'ordenador escriban as palabras..."rabaño crabas en a Sierra Gratal"...

Y  beyerán, si o tiempo no lo remeya, o prenzipio d'o final d'ista istoria.

                                                                                         sagardiana

Por os terrenos d'as Sierras Esteriors de Uesca, imonos a fer unas gambadetas...y a conoxer as chens, os lugars, as selbas, os bichos, os campos y as margens...

Istas pachinas solo que tienen ixa fin: Marchar por iste país.

Que o biache siga goyoso ta toz.

                                                                       sagardiana